love song

by: sebastian PK 

iginawa kita ng tula

lumulutang sa mapait na alak

kasing pait ng ngiti mo

nung ika’y nagpaalam

maitim na tinta tumatakbo

sa mistulang lumuluhang

one-half lengthwise na papel

sing itim ng paningin ko

nung sinabi mo iba na mahal mo

eto mga kataga

matamis pa sa cotton candy

lamunin mo

tulad ng paglamon mo

sa aking iginuhit na paraiso

hindi ako galit

lumubog lang saglit

itong bangkang walang sagway

na pinaglagyan ko

ng aking rosaryo

at kalbaryo

nilalangoy ko

ang maputik na ilog

ng tadhana

pilit inaabot ang maputing buhangin

na iyong inaapakan

naghintay ako na iyong sagipin

pero hinagis mo saki’y

hindi lubid kundi barbwire

na dali-daling kumagat

sa aking mga pisngi

ako’y nagdurugo

habang hinihila mo

at bulag na nung ako’y

gumapang at lumuhod sa harap mo

sana’y hinayaan mo nalang akong malunod

sa malamig na tubig ng pag-iisa

sana’y wala ako dito ngayon

nakasabit sa ngiti ng buwan

nagyeyelong puso

at nagbabagang mata

isusuka ko nalang

itong aking pighati

bukas paggising ko

paracetamol lang katapat mo.